اسم گرامی : علی بن الحسین مشہور لقب : سجاد ولادت: 5 شعبان المعظم 38 ھ شہادت: 25 محرم الحرام 94 ھ
قرآنچۍ تعلیمات چھہ بنیادی ترٛن حصن منز تقسیم سپدان گۅڈٕنکہ حصہ چھہ معرفت تہٕ شناخت پروردگارس سٍتۍ مربوط ، دۅیم حصہ چھہ قانون تہٕ حقوقن سٍتۍ تعلق تھاوان تہٕ تریم حصہ چھہ اخلاقس سٍتۍ مربوط۔ائمہ معصومینن ہنزعلمی تہٕ عملی سیرتتہٕ چھہ یمنی ترن حصن پٮ۪ٹھ مشتمل ۔اما ییٚلہِ أسۍ امام سجاد علیہ السلام سنزٕ عملی سیرژ تہٕ کلامس کُن نظر چھہ تراوان، اسِہ چھہ زیادہ تر حقوقی تہٕ اخلاقی پہلو اتھ منز لبنہ یوان۔ حقوق کِس پہلوٗوَس منز چھہ امام جایہ جایہ پننس گفتارس منز سماجکس پرٛتھ نفرہ سندۍ خاطرہ قانون بیان کرنچۍ کوشش کران تاکہ تمہ ہکن پانس أندۍ پتۍ لسن بسن والٮ۪ن افرادن سٍتۍ ٹھیک برتاؤ تھٲوتھ۔
حقوقن ہنزٕ ۍرعایت کرنہٕ سٍتۍ چھہ سانِہ زندگی ہنا گنڈ لگان تہٕ باقین ہنز زندگی چھہ ہیکان محفوظ بٔنِتھ ۔ پنہٕ نٮ۪ن انفرادی مسٲیلن منز ہیکہ انسان ذاتی مرضی حساب پٔکِتھ، اما ییٚلہِ یُہے نفر اجتماعس تہٕ سماجس منز یوان چھہ امہ سنزن کینژن مرضیٚنہ تہٕ منمانٮ۪ن چھہ لگان گنڈ ۔
حقوقک دائرہ چھہ سمٲجی محدودیتن ہند دائرہ، یمہ سٍتۍ اکِہ طرفہ انسانس ذمہ دٲری ، فرمانبردٲری تہٕ اطاعت عٲئد چھہ گژھان تہٕ بیہ طرف چھہ انسانس سندۍ خاطرہ کینژن بندِشَن ہُند سبب بنان، پرتھہ ذمہ دٲریاہ چھہ حق وجودس منز اننک سبب بنان تہٕ پرتھ حقاہ چھہ انسانس ذمہ دار بناوان۔ یہ حقک تٕہ ذمہ دٲری ہُند تلازُم چھہ قرآن مجید کینہ احکامن منز بخوبی یوان لبنہ ، تہٕ امام سجادن علیہ السلام تِہ چھہ "رسالہ حقوقس " اندر ٲتھۍ مسئلس کُن زیاد ظۅن تھوٗومت۔
حقوق یا رائٹس چھہ عقلی تہٕ شرعی احکامن ہند اکھہ کۅلیکشن، یس انفرادی یا اجتماعی روابطہ سندارنہ خاطرہ سماجس اندر قائم چھ یوان کرنہ ، امہ لحاظ چھہ امِیُک آگُر تہٕ منشا عقل ، اما اخلاقک آگُر اگر أسۍ ژھانڈو سہ ہیکو أسۍ عوٲطفن تہٕ احساساتن منز لبتھ ، تہٕ اخلاقی اصوٗل چھہ أسۍ دوہ دشہ روٲبطن اندر عاطفی تہٕ احساساتی ماحولس منز میلان ۔ یمن مسٲئلن اندر انسانی احساسات تہٕ عوٲطف سرد گژھن تہٕ مایہ تہٕ محبت ختم گژھۍ، ناچار چھہ تتتھٕ پیوان عدالت قائم کرنہ خاطرقانون بارسس انۅن تہٕ تتھ کٲم ہنۍ ، کیازہ کہ اکھہ بے احساس انسان ہیکہ اخلاقی اصولن لتہٕ منڈ کرتھۍ ، اما یہ قانون ہیکہ نہ امس بے احساس انسانس زیاد س کالس پتھ رٹٮ۪تھ۔ امام سجاد علیہ السلام تہٕ چھہ انفرادی مسائلن اندر قانونی اصولو بجائے اخلاقی اصولن پٮ۪ٹھ عمل کرنچۍ تاکید کران، اما سمٲجی تہٕ اجتمٲعی مسٲئلن منز چھہ قانونی اصولن سٍتۍ سٍتۍ اخلاقی اصولن ہنز تہٕ پیروی کرنۍ لٲزم۔
دۅیمن الفاظن منز ونو یتھ کنہ زِ، اگر چہ قانونس چھہ سمٲجی روٲبطن منز بہتری اننس منز جان رول نباوان ، اما جان تہٕ زبر روٲبطہ چھہ ہیکان صرف اخلاقی اصولو ذریعہ سماجس اندر پَید ہ سپدیتۍ۔ تکیازِہ امہ برونہہ زِ انسان بنہ قانونس نشہ جوابگو امس چھہ پیوان گوٛڈ پننسۍ ضمیرس تہٕ وجدانس جواب دیون۔
امام سجاد علیہ السلام چھہ انفرادی دٲئرہ کارس اندر ، اخلاقی لحاظ تمام بشریتس خاطر اکھہ نمونہ ۔ تاریخ چھہ امہ کتھِہ ہنز گواہ زِ ، یتھہ کنہ یمہ جناب پروردگار عالمینس روبرو ٲسۍ زین العابدین تہٕ سید الساجدین، تتھے کنۍ ٲسۍ عوامس برونہہ کُنہ سید الکریم ، یہندۍ اخلٲقی اصوٗل ، عوٲطف تہٕ احساسات یتھہ کنہ یمن پروردگارس بروہنہ کنہ نمراوان ٲسۍ تتھے کنہ ٲسٮ۪کھ عوامس بروہنہ کنہ تواضع تہٕ فروتنی پٮ۪ٹھ وتش دوان۔
شیخ مفید چھہ نقل کران زِ، اکہ دۅہ ٲسۍ امام زین العابدین علیہ السلام اکس لوٗکہ جماعتس درمیان تشریف فرما نفراہ آو تہٕ تمہ ہیوت امامس ناسزا ونن، امام علیہ السلام روٗدۍ خاموش، ییٚلہِ سُہ نفر دراو، امامن فرموو لوٗکن، بہ چھوس یژھان توہۍ کٕرِو میہ ہمرٲہی تہٕ بہ دِمہ امِس نفرہ سنزۍ بدکلٲمی واپس جواب،امام دراے یہ آیت تلاوت کران کران: والکاظمین الغیظ و العافین عن الناس و اللہ یحب المحسنین [ یمہ شرارت چوان چھہ ﴿براداشت چھہ کران ﴾تہ لوٗکن چھہ درگذر کران، پروردگار چھہ احسان کرنہ والن سٹھا پسند کران۔ ]
راوی چھہ نقل کران ، ییٚلہِ امام علیہ السلام یہ آیت ٲسۍ پران مہ زوٚن زِ ، امام علیہ السلام کرنہ امِس نفرس سٍتۍ بدکلٲمی ،ییٚلہِ امام امس نفرہ سند گر وٲتۍ تہٕ دیِونس ناد علی بن حسین علیہ السلام چھی ژھانڈان، یام امہ نفرن یہ بوز ، تہٕ یہ گو لڑای کرنہ خاطرہ تیار ،تکیازِہ امس گو یقین زِ امام علیہ السلام چھہ ادلس بدلہ ہینہ آمت ۔امامن ییٚلہِ یہ شخص وُچھہ فرموو نس اے برادر! توہۍ آیو مہ نشہ تہٕ مہ سٍتۍ کرو بد کلٲمی ، یہ توہِہ وونو اگر تِمو بدیو منز میہ منز کاہنہ بدی آسہ بہ چھوس پروردگارس طلب بخشش کران، و اگر میہ منز تمو کاہنہ بدیاہ چھنہ پروردگار کرٕنے مغفرت ۔ روای چھہ نقل کران :ییٚلہِ امہ نفرن امام علیہ السلام سند یہ کلام بوٗز ، آو برونہہ کُن تہ امام علیہ السلام سنزی پیشانی کرُن میوٗٹھ تہٕ عرض کرُن ، ییہِ میہ توہِہ متعلق ووٚن تہٕ چھنہ توہہ منز لبنہ یوان بلکہ یمہ بدی تہٕ برٲئی چھہ ساری مہ منز تہٕ بہ چھوس یمن لائق ،
ییہ حدیث چھہ یہ کتھ روشن کران ز ، امام سنز زندگی قرآنی اخلاقکس سایہ تل پھانپھلیامژ تہٕ یہنز زندگی چھہ سانہ خاطرہ اکھ نمونہ عمل۔بیدار ضمیر وول انسان ہیکہ نہ بیہ سند حق تلف کرتھ ، تکیازہ امہ سندۍ احساسات چھنہ امس بیہ سند حق پامال کرنک اجازت دوان۔ اگر انسان ہر ہمیشہ بیہ سندۍ حقچ رعایت کٕرِ سماجس منز گلۍ تمامن برٲینہ ہند نیال تہ سہ سماج ہیکہ اکھ آئیڈئیل تہ مثٲلی سماج بنتھ۔
ناشناس
